రక్షణ రంగ పరిశోధనాలలో ఆంధ్ర విశ్వవిద్యాలయం ఆచార్యుల భాగస్వామ్యం ఉండాలని ఏయు ఉపకులపతి ఆచార్య జి.పి రాజశేఖర్ అన్నారు. శుక్రవారం ఏ.యూ అమెరికన్ కార్నర్ లో ఏయూ రీసెర్చ్ డెవలప్మెంట్ విభాగం, ఎస్ఐడిఎం సంయుక్తంగా నిర్వహించిన ఆప్టిమైజింగ్ డిఫెన్స్ ఇండస్ట్రీస్ డెవలప్మెంట్ క్యాపబిలిటీస్ విత్ కొలాబరేషన్ ఆఫ్ ఎక్స్పర్ట్ సదస్సులో ఆయన పాల్గొని ప్రసంగించారు. ఈ సందర్భంగా ఏ యూ వీసీ ఆచార్య రాజశేఖర్ మాట్లాడుతూ పీహెచ్డీ పరిశోధకులకు ఒక అధ్యయన అంశంగా రక్షణ సంబంధ సమస్యను అందించాలని సూచించారు. ఈ పరిశోధన ప్రాజెక్టులలో విద్యార్థులను వివిధ దశల్లో భాగస్వాములను చేయడం ఎంతో అవసరమని అన్నారు.  యూజీ,పిజి, పీహెచ్డీ విద్యార్థులను ఇటువంటి పరిశోధన సంబంధిత అంశాలలో భాగస్వాములను చేసే దిశగా ఆలోచన చేస్తున్నట్లు తెలిపారు. త్వరలో ఆసక్తి కలిగిన ఆచార్యులతో ఒక గ్రూపును తయారు చేస్తామని అన్నారు. డి ఆర్ డి ఓ సెంటర్ ఆఫ్ ఎక్స్లెన్స్ ఆంధ్ర విశ్వవిద్యాలయంలో ఏర్పాటు చేసే విధంగా కృషి చేస్తామని అన్నారు.